മുംബൈ: രാജ്യത്തെ പ്രമുഖ വാഹന നിര്‍മാതാക്കളായ മഹീന്ദ്ര ആന്‍റ് മഹീന്ദ്ര ഒരാഴ്ചത്തേക്ക് ഉല്‍പാദനം നിര്‍ത്തിവെക്കുന്നു. സെപ്റ്റംബര്‍ മാസത്തില്‍ 20-25 ശതമാനം വരെ മൊത്തം ഉല്‍പാദനത്തില്‍ കുറവു വരുമെന്ന് കമ്ബനി വൃത്തങ്ങള്‍ നല്‍കുന്ന സൂചന.
ആവശ്യമായ സൂപര്‍കണ്ടക്ടര്‍ ചിപ്പുകള്‍ എത്താത്തതാണ് വില്ലനാകുന്നത്. ലോകം മുഴുക്കെ ഇതേ പ്രതിസന്ധി നിലനില്‍ക്കുണ്ട്. സെപ്റ്റംബറിലെ ഉല്‍പാദനത്തെ ബാധിക്കുമെന്ന് പ്രതീക്ഷിക്കുന്നതായി നേരത്തെ മാരുതിയും സൂചിപ്പിച്ചിരുന്നു. ഹരിയാന, ഗുജറാത്ത് പ്ലാന്‍റുകളിലെ ഉല്‍പാദനത്തെ ബാധിക്കുമെന്നാണ് മാരുതി വ്യക്തമാക്കിയിരുന്നത്. മഹീന്ദ്രയുടെ ട്രാക്ടര്‍, ട്രക്കുകള്‍, ബസുകള്‍, ത്രീവീലര്‍ എന്നിവയുടെ ഉല്‍പാദനത്തെയും കയറ്റുമതിയെയും ഇത് ബാധിക്കില്ല.
2020ല്‍ കോവിഡ് ലോകത്ത് പിടിമുറുക്കിയതോടെ ഉല്‍പാദനം കുറഞ്ഞതാണ് ചിപ്പുകള്‍ ലോക വിപണിയില്‍ ആവശ്യത്തിന് ലഭ്യമല്ലാതാക്കിയത്. വിവിധ മേഖലകളില്‍ ഒരേ പ്രതിസന്ധിയായി ഇത് നിലനില്‍ക്കുന്നുണ്ട്. അടുത്ത വര്‍ഷം വരെ തുടരുമെന്നും മുന്നറിയിപ്പുണ്ട്.
സ്മാര്‍ട്ഫോണുകള്‍, ലാപ്ടോപുകള്‍, വാഹനങ്ങള്‍, വീട്ടുപകരണങ്ങള്‍, എ.ടി.എമ്മുകള്‍ എന്നിങ്ങനെ എണ്ണമറ്റ പുതിയകാല ഉല്‍പന്നങ്ങളുടെ ഹൃദയമായാണ് സിലിക്കണില്‍നിന്ന് ഉണ്ടാക്കുന്ന ചിപ്പുകള്‍ പ്രവര്‍ത്തിക്കുന്നത്. അതിവേഗ ഗണിതം, പ്രവര്‍ത്തന നിയന്ത്രണം, ഡേറ്റ പ്രോസസിങ്, വിവര സംഭരണം, സെന്‍സിങ് തുടങ്ങി ഇവ നിര്‍വഹിക്കുന്ന സേവനങ്ങളുടെ ലോകവും വലുതാണ്. അവയില്ലാതെ വാഹനങ്ങളും മറ്റു ഉല്‍പന്നങ്ങളും നിര്‍മിക്കാനാവില്ലെന്നതാണ് സ്ഥിതി
0 Comments